أنطوان زهرة يضرب من جديد ..

طوني حداد

kharbshatشو عم يخبروني أنّو المجتمع المدني كحشك أو كحتك أي “طردك” ياطوني زهرا البارحة..
العمى ليه؟
طيب على علمي أنو انتا ومعلمك “حكيم الزمان”-تبع الزهرة- دينكم ومعبودكم المجتمع المدني؟!
وعلى علمي انو صَلاتكم الربّانية صارت :

ابانا الذي في السموات والمجتمع المدني عالأرض..!

حتى بالعلامة انتو جماعة “العبور للدولة وحب الحياة” صرتوا آخدين كذا صورة تذكارية انتوا والمجتمع المدني-المدني تبعكن طبعاً- ومبتسمين بوداعة وغامرين بعض بشكل حميم و”مشبوه” أحياناً ومنشورة الصور عالفيسبوك وأقرانه حاصدة أرقام قياسية” باللايكات والكومتنات” تبع يللي بتنمّل البدن وبتشلي الدموع من كتر التأثر البالغ السن القانوني..!

كيف تا طردك المجتمع المدني أمس ياماريشال زهرا؟
صاير شي زعل بيناتكن أو سوء تفاهم لاسمح الله ونحنا مامعنا خبر؟!
غريبة القصة والله..وغريب هالمجتمع المدني.. ماالو صاحب!
اوعى تكون عامل شي ضرب نذالة مع هالمجتمع المدني ياطوني زهرة..شنّو لأنّو سعادتك الك سوابق بهاالحركات النص كم..
ليك مسيو زهرا: ماتسكت على هالاهانة البتّة..مش حلوة بحقك وبحق تاريخك “النضالي” الطويل العريض تنطرد وينمسح فيك الأراضي بهذا الشكل الشرشوح..

سماع منّي ورجاع ركّب “حاجز البربارة” عن جديد واقطع الطريق وخلّي ابن مرا يقدر يقطع عاطرابلس..خلّي الشاطر يقدر يمرّق ربطة خبز ويضل واقف على اجريه ..وانتا قدا وقدود وعندك تجربة اخت شليتة بهذا الخصوص..

وليك سعادة النائب :
بقترح عليك تعمل افتتاح رسمي للحاجز أو بالاصح اعادة افتتاح وتقيم حفلة أسطوريّة تدخل بكتاب “غينيس” وتعزم عليها رفاقك ثوّار الأرنبيط تبع الحئيئة المرّة –وصب قهوة مرّة- وعزوم “اي ادع” عاشقي الضريح وحمامات السلام وطيّر حمام..
وجّه دعوات للشهّال ودقماق وخالد الضاهر ووفد من داعش وداحش وباحش والنصرة وحاشا وزهران علوش “معلمو الجديد لميشيل كيلو بعد ماتبرّأ من لينين” وعزوم الفاتح الجولاني والبغدادي رمزا “الاعتدال” ,وجميع أمراء زواريب ثورة كل من ايدو الو في “امارة” سورية والعراق وسائر بلاد الهجرة و الجهاد , ووفد حرزان من آل شخبوط تبع الكاز والغاز ومش غلط يكون في رفاق من منظمة “بوكو حرام” الانسانيّة وماتنسى –وهيدا أهم شي- تعلّق صورة الرفيق الملك عبدالله ابن عبد العزيز “أبو متعب” الأب الروحي للربيع العربي وجهاد النكاح بأعلى مكان في ساحة الاحتفال.. هيك تكون شي صورة عملاقة تنشاف من البترون لبيروت.. بيبقى بيبعتلك ياها سعدو الحريري بطيارتو الخاصة بكل رحابة صدر, وجيب طبل وزمر –وماتعتل هم الرقّاصة فالائتلاف السوري المعارض تبع”أبله بندر” موهوب متل معلمو وبيقوم بالمهمة الثورية الراقصة على أكمل وجه- احتفاءً بالمناسبة ,وخلّي رقصة “العرضة” السعودية تولّع تحت أرز الرب-العرضة بالضاد مش بالصاد ماحدا يفهمنا غلط وهي ذاتها الرقصة يللي أبدع فيها ابن العم جورج بوش لما كان ضيفاً على مضارب آل شخبوط متفقّداً رعاياه وقبض “المعلوم” -وماتنسى ياسعادة النائب تعزم “ناطور بعبدا” عالحفلة.. هلق هيدا وجودو متل قلتو بس لابأس بمراعاة البروتوكول مش غلط, وأكيد فخامتو بيحضر..مابيفوّت هيك فرصة تاريخيّة..بيستأذن “الباب العالي” في الرياض وبيجي على عجل ملبياً نداء “الاعتدال” المقدس ..لابل بيكون أول واحد ب”العرضة” -بالضاد طبعاً-..
وهيك بتكمل الجوقة..
وهنيئاً لكم هذا الانتصار المبين..!

كيفك فيا يازهرة يابو الزهور؟!
لوحة سوريالية مش هيك؟!

اي مش أكثر سورياليةً من زيارتك لغزّة..!

  • فاطمة

    يعني يا أستاذ طوني شو هالبراعة أعدت البسمة لنا قبل ان نخلد للنوم عنجد ما قصرت وما بتقصر أبدا مع هكذا جماعات ونحن بانتظار تعليقاتك على هيدا الضاهر ومنامه وصاروخه معك الى الكلام الممتع والله يديمك

    • طوني حداد

      أختي فاطمة:
      انا مدينٌ لكِ بدعمكِ الدائم لما أكتبْ..
      شكراً أيتها الحرّة..

  • ghassan kdouh

    Hehehe

    • طوني حداد

      تحياتي عزيزي غسان..
      اضحك تضحك لك الدنيا..
      مودتي..

  • ابو نقولا

    يعني يا أستاذ طوني إعطاء الأهمية للصعاليك هدول ،زهره وفرحة ومرحة واضاعة الوقت بالكتابة عن ناس نكرة ومتل كعب الفأس لا بينكش ولا بيعبي ،بيذكرني برفة جناح لسعيد تقي الدين ،"لا تضرب بسوطك حصانا ميتا"

    • طوني حداد

      المشكلة انهم لاقيمة لهم لكن الله مش مهدّيهم ..لذلك مضطرين بين مرّة ومرّة نذكّرهم بتاريخهم القذر
      تحياتي أبو نقولا وشكرا جزيلاً على متابعتك عزيزي..

  • David Nader

    مقالتك التهكمية روعة يا طوني حداد ، مش عم بتروح البسمة عن وجوهنا .. والله إنو جوقة حسبالله المساماة ١٤ الشهر بتستاهل هالمسخرة .. والله إنو من بعد ما قريت مقالتك وجعني قلبي على عناصر هالجوقة الأغبياء !

    • طوني حداد

      شكرا جزيلا عزيزي داوود..

  • أحمد الشرقاوي

    بالإضافة لروعتها وروح المرح والنكثة التي تغمرها، تعتبر مقالات الأخ طوني مرجعا في قاموس اللغة.
    وإلى الآن استفدت منها في تأثيت مقالاتي ببعض من كلماتها المعبرة، فاستعملت من دون إذن من 'طوني' عبارتين: "فخامة حصان طروادة" و "ناطور بعبدا".
    هذه التسميات البليغة دخلت التاريخ السياسي للبنان.
    شكرا 'طوني' وعذرا على الإقتباس من دون إذن لأني أشير إليك كمصدر ولا أعتدي على ملكيتك الفكرية.
    تحياتي القلبية

    • طوني حداد

      زميلي العزيز احمد الشرقاوي:
      اقتباسك لبعض من عباراتي شرفٌ لي..
      متابعٌ لمقالاتك الجميلة والقيّمة على موقعنا العزيز بانوراما الشرق الأوسط
      دمتَ بخير..

  • لبناني في المهجر

    اعجبني الاسلوب في الكتابة ما جعلني اتابع قراءة كل مقالاتك . تحية لك من القلب للقلب استاذ طوني حداد مع المزيد من فضح تحار الدم والطائفية البغيضة احفاد داعش وممثليهم في 14 شباط المندوبين الدائمين ل مشخات الخليج وعهار بلاد الحجاز ارباب الارهاب في العالم

  • sami alboustani

    ما تنسى كمان هنههههية وخخخخخالد مششششعل يا زهرة اللوتس وما تنسى القرنبيطة لأنوا بالعربي أسموا زهرة